អត្ថាធិប្បាយ

នេះ​ជា​ពាក្យ​ឧបមា ប្រៀបប្រដូច​មនុស្ស​រាល់​រូប​ទៅ​នឹង «វល្លិ» ។ យ៉ាងណាមិញ មនុស្ស​យើង​ដែល​នៅ​ជិត​គ្នា អាច​ក្លាយជា​មិត្រ​ឬ​សត្រូវ អាច​ចាប់ចិត្ត​ស្រឡាញ់​រួច​រៀបការ​ជាមួយ​គ្នា អាច​និយាយដើម​គ្នា​ឬ​មួយ​បង្អាប់ តិះដៀល​គ្នា ។ល។​ ដោយហេតុ​នេះ គួរ​យល់​ថា​ ធម្មតា​វល្លិ​មិន​ដែល​វារ​ឡើង​ឈើ​ណា​ដែល​នៅ​ឆ្ងាយ​ពី​ខ្លួន​វា​នោះ​ទេ ។ មនុស្ស​ដែល​នាំ​រឿងរ៉ាវ​ទុក្ខ​ព្រួយ​កង្វល់​មក​ដល់​យើង ភាគច្រើន​គឺ​នៅ​ក្នុង​ពពួក​មនុស្ស​ដែល​ស្គាល់​យើង​ច្បាស់ ហើយ​ជួនកាល​ ជា​មិត្រ​របស់​យើង​ទៀត​ផង ។ មនុស្ស​ដែល​នៅ​ឆ្ងាយ​ពី​យើង​ ហើយ​មិន​ស្គាល់​រូបយើង​ ប្រហែលជា​មិន​មក​ខ្ចី​លុយ​យើង​ទេ! ។ កំលោះ​និង​ក្រមុំ​ដែល​នៅ​ឆ្ងាយ​ពី​គ្នា​ មិន​ដែល​ស្គាល់គ្នា​ ប្រាកដជា​មិន​អាច​ចងមេត្រី​ភាព​ជាមួយ​គ្នា​បាន​ទេ ហេតុនេះ បើ​ផ្ទះ​ណា​មាន​កូន​ក្រមុំ​ គួរ​ប្រយ័ត្ន​ «ឆ្មាបា» ដែល​នៅ​ជិតខាង កុំ​ខ្វល់​ពី​អា​ឈ្មោល​ដែល​នៅ​ឆ្ងាយ​ដាច់​ស្រយាល ៕