អត្ថាធិប្បាយ

នេះ​គឺ​ជា​ពាក្យ​ឧបមា​ពី​ចរិត​មនុស្ស​ខ្លះ​ដែល​ចេះ​លាក់​ពុត ឬ​លាក់​បំណង​អាក្រក់​របស់​គេ​មិន​ឲ្យ​អ្នក​ណា​ដឹង ។ យ៉ាង​ណា​មិញ ពេល​គេ​បរិភោគ​អាហារ គេ​ហាក់​ដូច​ជា​មិន​អើពើ​ទៅ​លើ​ដុំ​សាច់​ដែល​នៅ​ក្នុង​ចាន​នោះ​ទេ​.. គេ​ហុត​តែ​ទឹក​ដោយ​ចង់​បង្ហាញ​ឲ្យ​គេ​ដឹង​ថា ខ្លួន​ជា​មនុស្ស «មិន​ចេះ​លោភ​លន់» ឬ​ថា​ជា​មនុស្ស​សន្ដោស ។ល។ ប៉ុន្តែ​ក្នុង​បេះដូង​វិញ គាត់​នោះ​ចង់​តែ​ត្របាក់​សាច់​ទាំង​ប៉ុន្មាន​នោះ​តែ​ម្នាក់​ឯង ។ ន័យ​ម្យ៉ាង​វិញ​ទៀត ពាក្យ​ថា «ហុត​ទឹក» គឺ​ធ្វើការ​ដ៏​តូច​មួយ ហើយ​ប្រាថ្នា​ផល​ធំ ឧទាហរណ៍ បុរស​ម្នាក់​បាន​ចាប់​ចិត្ត​ស្រលាញ់​នារី​ម្នាក់​យ៉ាង​ខ្លាំង ចង់​បាន​នាង​មក​ធ្វើ​ជា​ប្រពន្ធ​របស់​ខ្លួន ។ គេ​ចាប់​ផ្ដើម​អែបអប​ម្ដាយ​‑​ឪពុក និង​បង​ប្អូន​ទាំង​អស់​របស់​នាង ដោយ​ទិញ​នេះ ឬ​ទិញ​នោះ​យក​មក​ឲ្យ ដោយ​ជួយ​ធ្វើការ ដោយ​ប្រកាន់​ចរិយា​ទន់​ភ្លន់ តម្រូវ​ចិត្ត ។ល។ ឬ​ដោយ​វិធី​ផ្សេង​ទៀត​ដែល​សុទ្ធ​តែ​ឧបាយកល​ដើម្បី​បន្ទន់​ចិត្ត​គ្រួសារ​ទាំង​មូល​ឲ្យ​គេ​បាក់​ចិត្ត​មក​លើ​ខ្លួន ហើយ​នៅ​ទីបំផុត ខ្លួន​អាច​ចូល​ទៅ​ជិត​នាង​នោះ​បាន ។ អ្វីៗ​ដែល​បុរស​នោះ​ធ្វើ ចាត់​ទុក​ជា «ហុត​ទឹក» ឯ​រឿង «សម្លឹង​កាក» គឺ «ខ្លួន​នារី» នោះ​តែ​ម្ដង ។

ពាក្យហៅហានប្រែថាកាច
បានខាងមនុស្សចិត្តកំណាច ឥតមានកោតខ្លាចមនុស្សផងគ្នា ។
ឆបោកលួចឆក់ប្លន់អ្នកស្រុក ឲ្យគេកើតទុក្ខកើតវេទនា
ឲ្យខូចឲ្យខាតបង់ទ្រព្យា ដោយពុតពាលាអាក្រក់ក្រៃ ។
មនុស្សកាចហៅហានឈ្លានពានពេក ច្រើនដេកមិនលក់រាល់យប់ថ្ងៃ
មិនសូវនៅស្រុកច្រើននៅព្រៃ ដោយភ័យខ្លាចម្ចាស់គេចាប់បាន ។
ឬពួកប្រមឹកផឹកសុរា ស្រវឹងឡូឡាកាចសាមាន្យ
ជេរពោលរោលពត់ញាតិសន្តាន នាំគេរំខានមិនសូវឈប់ ។
មនុស្សបែបនេះឯងកាលបើភ្លាត់ ជ្រុលមាត់ជ្រុលកមិនមានទប់
ដោយគិតថាក្រែងគេប្រារព្ធ ត្រឡប់រករឿងដល់ខ្លួនវិញ ។
តែងដេកមិនលក់ព្រោះផលកាច ដែលខ្លួនកំណាចកើតទុក្ខម្នេញ
ហេតុនេះទើបលោកពោលរំគេញ ដូចខាងដើមមិញឲ្យបានដឹង ។